The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe Overthrowing [At-Takwir] - Uzbek translation - Alaauddin Mansour
Surah The Overthrowing [At-Takwir] Ayah 29 Location Maccah Number 81
Қуёш ўралиб (нурсизланиб) қолганида;
Юлдузлар ҳам (ўз фалакларидан) тўкилганида;
Тоғлар ҳам (ўз жойларидан) жилдирилганида;
(Қорнидаги боласи) ўн ойлик бўлган бўғоз туялар ҳам бўш қўйиб юборилганида;
Ваҳший ҳайвонлар ҳам (бир жойга) тўпланиб қолганида;
Денгизлар (тандир каби) қизитилганида (ва сув ўрнига олов билан тўлганида);
Жонлар (қайтадан баданларга) жуфтланганида;
Тириклай кўмилган (ҳар бир) қиздан сўралганида,
қандай гуноҳ сабабли ўлдирилгани ҳақида (сўралганида);
(Номаи аъмол) саҳифалари очилганида;
Осмон (ернинг устидан) сидириб олинганида;
Дўзах (кофирлар учун) ловуллатиб ёқилганида;
Жаннат (тақводор зотларга) яқин қилинганида;
(Ана ўша Кунда ҳар бир) жон ўзи (мана шу Кун учун) ҳозирлаб келган нарсани (яъни, барча яхши-ёмон амалларини) билур![1]
Бас, Мен (кундузлари кўздан) ғойиб бўлгувчи (юлдуз)ларга қасам;
(Кечалари ҳам) тез ўтиб, (ўз «уя»лари — буржларига) яширингувчи (юлдуз)ларга қасам;
Ўз зулмати билан келиб-кетаётган кечага қасам;
Ва отаётган тонгга қасам ичурманки,
Шак-шубҳасиз, у (Қуръон) бир улуғ элчининг (яъни, Жаброил фариштанинг Аллоҳ таоло томонидан келтирган) сўзидир.
У қувватли, Аршнинг соҳиби (бўлмиш Аллоҳ) наздида макон-мартабали,
У жойда (яъни, осмонларда фаришталар томонидан) итоат этилгувчи, ишончли (элчининг Аллоҳ таоло томонидан келтирган сўзидир).
Ва сизларнинг соҳибингиз (Муҳаммад алайҳис-салоту вас-салом) мажнун эмасдир.
Дарҳақиқат, у (Жаброилни) очиқ уфқда кўрди.
У (Муҳаммад алайҳис-салоту вас-салом) ғайбга (яъни, ғайбдан келган ваҳийга) бахил ҳам эмасдир. (У Аллоҳ таоло томонидан ўзига келадиган ваҳийларни бузмасдан, тўла-тўкис ҳолда сизларга етказур).
Ва у (Қуръон) қувилган — малъун шайтоннинг сўзи эмасдир.
Бас, сизлар (мана шу Қуръони Карим кўрсатган Ҳақ йўлни инкор этиб) қаён кетмоқдасизлар?!
У (Қуръон) ҳеч шак-шубҳасиз, бутун оламлар учун бир эслатмадир.
— Сизларнинг орангиздаги Тўғри Йўлда бўлмоқни хоҳлаган кишилар учун (бир эслатмадир).
Сизлар фақат бутун оламлар Парвардигори бўлмиш Аллоҳ хоҳласагина (Тўғри Йўлда бўлишни) хоҳларсизлар.